今日好直接及毫無保留地拒絕左一項服事的邀請, 其實我某程度上都唔想咁, 咁好意思!

如果唔係有標竿, 如果唔係負責訂飯, 如果唔係要彈結他, 如果唔係有星期六的小組, 如果唔係覺得自己已經OVERLOAD, 如果唔係星期三爆發左... 如果如果, 如果唔係呢一切一次過殺埋身, 醒, 我一定幫你手!!!

好同意老闆講, 如果星期五要負責帶小組, 星期六又要帶小組, 真係好辛苦! 咁就變左星期三同星期四預備星期五同星期六的聚會, 再加埋星期日的崇拜同星期二的練歌... (大家唔好忙記仲要返工!) 我上個禮拜就係咁經歷左, 完全係無一晚好好咁休息過! 完全係覺得自己唔係好知為咩要咁忙??? 同埋咁樣事奉法, 個心都好似唔係完全為主而做咁!

最後係頂唔住...星期四請左病假... 可能因為前一晚壓力實在太大, 我個肚痛左成晚, 返到屋企好返少少, 但夜晚又訓唔著, 仲諗緊訂飯點可以做得好d, 結果星期四起身個肚仲係抽住抽住咁, 索性請病假休息一o下! 訓足成日之後感覺先好返少少!

其實我自己對於o係大粒A的角色都好清楚, 我只係想安安份份咁做一個組員仔, 我都好需要大家的支持及組長的鼓勵! 我明白身為組員就應該要為組出一分力, 可以的話就帶o下聚會, 唔使次次都係果幾個弟兄姊妹帶, 但你當我自私又好點都好, 我想大粒A組係我可以支取力量o既地方, 而唔係一個我再要去付出的地方, 我目前黎講係十分之唔願意帶聚會! 當然o係組內我願意積極地分享! 希望大家體諒!

上個星期二晚食飯果陣, 我提起我口腔內縕釀緊生飛滋, 點知就出事啦, 引起媽媽講野o既興趣..."你呀, 唔好飲咁多咖啡, 又唔好食咁多朱古力同熱氣野..." (下刪數百字...) 我短短回應o左一句, "都唔關事", 仲慘, 仲多o野講, 我其實某程度上已經轉o左半邊身向住個電視, 但佢都係咁講落去... 終於忍唔住, 同佢講o左聲 " 好啦, 夠啦." 要強調一點o既係, 我已經好好咁控制住我o既情緒, 我講呢句說話o既語氣係相當溫和, 完全唔係要駁佢果種態度!

我都唔知點解, 但咁就撩起o左佢把火, "乜你d脾氣咁臭?! 又唔係話你d 咩, 做咩咁講o野? 我講o野你無話聽o既!" 唉, 我都唔知講咩好, 回應佢又話我駁佢, 同埋我都驚自己控制唔住, 所以我忍!!! 而佢都無再繼續, 食完飯我就入o左房啦!

第二朝起身, 完全feel到佢度氣仲未落, 平時佢都會問我返唔返屋企食飯, 想食咩等等o既問題, 但果朝o既"黑面"指數仲係好高! 為免再引起衝突, 我只係同爸爸講我唔返屋企食飯就返工啦! 果晚同朋友食完飯, 返到屋企未夠十一點, 媽媽居然已經訓o左? o下, 咁早?!?!? 又係未有機會講o野...

星期四朝早, 同樣係無o野講, 但我就開始因為呢件事而有多少困擾同唔開心! 夜晚因為要去配眼鏡, 所以父母先食飯, 我返到去扮無o野咁問d飯o係邊, 但媽媽只係勁cool咁答o左一句: o係飯煲囉! 嘩, 仲未嬲完???? 因為我都係唔知點處理, 所以又係無溝通o既一晚...

其實成件事都好簡單, 而我唔覺得我有做錯, 或者我有頂撞佢, 所以我完全唔知佢嬲咩, 亦唔知點解可以嬲咁耐?!?!? 星期五同小組分享o左件事之後, 佢o地建議我買o野食俾媽媽, 之後扮無事! 星期五晚放小組已經夜啦, 所以都買唔到d咩... 亦都無咩講...

星期六朝要返工, 媽媽未起身, 我返到屋企佢又唔o係度, 我成日都見唔到佢! 而今日放教會專登買o左個翠華o既奶油豬, 點知媽媽又唔o係屋企...

我已經將件事祈禱交俾神, 但我始終都唔認為我有做錯, 所我唔知點... 但有多少唔開心...